గుట్టుగా ఎంపిక

గుట్టుగా ఎంపిక
గుట్టుచప్పుడు కాకుండా నియామకపత్రాలందజేత
గంటల వ్యవధిలో హాజరు కావాలని అదేశం
మెరిట్‌ లిస్టు లేకుండానే ఎంపిక ప్రక్రియ
పలువురిలో అనుమానాలు
అధికారుల తీరుపై ఆగ్రహం
అనంతపురం : జిల్లా ఎక్సైజ్‌ శాఖ పరిధిలోని ప్రభుత్వ మద్యం దుకాణాల్లో పోస్టుల భర్తీపై ఏదో కిరికిరి జరిగిందనే అనుమనాలు వ్యక్తమవుతున్నాయి. అభ్యర్థుల మెరిట్‌ లిస్టు ప్రదర్శించకుండా గుట్టుచప్పుడు కాకుండా ఉద్యోగాలకు అభ్యర్థులను ఎంపిక చేయడం పలు అనుమానాలకు తావిస్తోంది. నిరుద్యోగ అభ్యర్థులను ఈ వ్యవహారం కలవరపెడుతోంది. మొత్తమ్మీద ప్రభుత్వ మద్యం దుకాణాల్లోని సూపర్‌వైజర్‌, సేల్స్‌మెన్‌ ఉద్యోగాల భర్తీ ప్రక్రియలో గందరగోళ పరిస్థితి ఏర్పడింది. అయితే ఆశాఖ అధికారులు మాత్రం నిబంధనల ప్రకారమే పోస్టులు భర్తీచేశామని చెప్పుకుంటూండడం ఆశ్చర్యం కలిగిస్తోంది. అభ్యర్థుల ఎంపిక ప్రక్రియలో రాజకీయ సిఫార్సులకు పేదపీట వేశారనే ఆరోపణలున్నాయి.
గుట్టుచప్పుడు కాకుండా : జిల్లాలో ఎక్సైజ్‌శాఖ పరిధిలోని 198 ప్రభుత్వ మద్యం దుకాణాల్లో 198 సూపర్‌వైజర్‌, 495 సేల్స్‌మెన్‌ పోస్టుల భర్తీకి సంబంధించి రాష్ట్ర ప్రభుత్వం నోటిఫికేషన్‌ జారీచేయడంతో నిరుద్యోగుల్లో ఆశలు చిగురించాయి. అయితే ఈ ప్రక్రియలో ఆశాఖ అధికారులు, కమిటీ సభ్యులు అనుసరించిన విధానం అభ్యర్థులను ఆందోళనకు గురిచేసింది. గతంలో ఎన్నడూ లేనివిధంగా అభ్యర్థుల మెరిట్‌ లిస్టు ప్రదర్శించకుండా అభ్యర్థులను ఎంపిక చేయడంపై అభ్యంతరాలు వ్యక్తమవుతున్నాయి. కొందరు అభ్యర్థులైతే ఆయా కేంద్రాల వద్ద ఆందోళన కూడా చేశారు. అయినా అధికారులు స్పందించకపోవడంతో నిరాశతో వెనుదిరిగారు. చివరికి మెరిట్‌లిస్టు ప్రకటించకుండానే నియామక పత్రాలు తీసుకోవాల్సిందిగా అభ్యర్థుల సెల్‌ఫోన్లకు రహస్యంగా సమాచారం అందించడం పలు అనుమానాలకు తావిస్తోంది.
గంటల్లోనే హాజరుకు ఆహ్వానమేమిటో? : ప్రభుత్వ మద్యం దుకాణాల్లో ఉద్యోగాల భర్తీ ప్రక్రియ ఆది నుంచి గందరగోళంగానే సాగుతోంది. తమకు అన్యాయం జరిగిందని పలువురు అభ్యర్థులు ఆవేదన వ్యక్తం చేస్తున్నారు. కమిటీ సభ్యులు కూడా మెరిట్‌ లిస్టు ప్రకటించకుండా ఎంపిక ప్రక్రియ చేపట్టడం వారి అనుమానాలకు మరింత ఊతమిస్తోంది. ఇంటర్వ్యూలకు 1:7 ప్రకారం అభ్యర్థులను పిలిచారు. అయితే ఇంటర్వ్యూల తరువాత అర్హుల జాబితా ప్రకటించకుండా మంగళవారం రాత్రి ఉన్నట్టుండి కొందరు అభ్యర్థుల సెల్‌ఫోన్లకు రహస్యంగా సమాచారం అందించారు. దీంతో బుధవారం ఉదయం 10 గంటలకల్లా అభ్యర్థులు నగర శివారులోని ఏపీ బేవరేజెస్‌ కార్పొరేషన్‌ లిమిటెడ్‌(లిక్కర్‌ గోడౌన్‌) మేనేజర్‌ను కలిసి నియామక పత్రాలందుకున్నారు. ఇలా గంటల వ్యవధిలోనే అభ్యర్థులను రహస్యంగా ఆహ్వానించడం, వారు వచ్చి నియామక పత్రాలందుకోవడం మరింత చర్చకు దారితీస్తోంది.
మెరిట్‌ లిస్టు ఏదీ? : ప్రభుత్వ మద్యం దుకాణాల్లో పోస్టుల భర్తీకి సంబంధించి మెరిట్‌ లిస్టు ప్రదర్శించకుండానే ఎంపిక ప్రక్రియ పూర్తి చేయడంపై పలు అనుమానాలు వ్యక్తమవుతున్నాయి. సమయం తక్కువగా ఉందనే సాకుతో ఆశాఖ అధికారులు, కమిటీ సభ్యులు నిబంధనలకు పాతరేశారనే ఆరోపణలు వినిపిస్తున్నాయి. మెరిట్‌ లిస్టు ప్రకటించకపోవడం, రహస్యంగా అభ్యర్థుల సెల్‌ఫోన్లకు మేసేజి రూపంలో సమాచారం చేరవేయడం, పోస్టుల భర్తీపై ఆశించిన స్థాయిలో ప్రచారం చేయకపోవడం, సమయం లేదనే పేరుతో నిబంధనలకు పాతరేయడంపై సర్వత్రా విమర్శలు వినిపిస్తున్నాయి.
రాజకీయ సిఫార్సులకే పెద్దపీట : జిల్లాలోని ప్రభుత్వ మద్యం దుకాణాల్లో పోస్టుల భర్తీకి సంబంధించి రాజకీయ సిఫార్సులకే పెద్దపీట వేసినట్లు తెలుస్తోంది. ఈ కారణంగానే ఎంపిక కమిటీ నిబంధనలు తుంగలో తొక్కిందనే ఆరోపణలు వినిపిస్తున్నాయి. తాము సూచించిన అభ్యర్థులకే ఉద్యోగావకాశాలు కల్పించాలని ఆ శాఖ అధికారులతో పాటు కమిటీ సభ్యులకు రాజకీయ నాయకులు, ప్రజాప్రతినిధులు సిఫార్సు లేఖలు పంపారనే విమర్శలు వినిపిస్తున్నాయి. దీంతో కమిటీ సభ్యులు ఏమీ చేయలేక నిబంధనలు తుంగలో తొక్కినట్లు సమాచారం. ప్రజాప్రతినిధులు సూచించిన అభ్యర్థులు రిజర్వేషన్‌ ప్రకారం లేనందునే కొన్ని పోస్టులు భర్తీ చేయకుండా వదిలేశారనే విమర్శలు ఆ శాఖ వర్గాల నుంచి వ్యక్తమవుతూండడం గమనార్హం. మొత్తమ్మీద నిరుద్యోగ అభ్యర్థులతో పాటు అందరిలోనూ ఈ పోస్టుల భర్తీ ప్రక్రియ ఆందోళన కలిగిస్తోంది.
 
అధికారుల తీరుపై విమర్శలు..
ప్రభుత్వ మద్యం దుకాణాల్లోని ఉద్యోగాల భర్తీలో ఆ శాఖ అధికారులు, కమిటీ సభ్యులు వ్యవహరించిన తీరు దుమారం రేపుతోంది. ఎలాంటి స్పష్టమైన సమాచారం ప్రకటించకుండా ఉద్యోగాలు భర్తీ చేయడం అభ్యర్థులను కలవరపెడుతోంది. గతంలో ఎన్నడూ లేని విధంగా నడుచుకోవడంపై సర్వత్రా విమర్శలు వినిపిస్తున్నాయి. ఇదే విషయమై కొందరు అభ్యర్థులు ప్రశ్నించగా వారిపై చిందులు వేయడం వారి అనుమానాలకు మరింత బలం చేకూరుస్తోంది.  ఉద్యోగాల కోసం దరఖాస్తు చేసుకున్న అభ్యర్థుల సంఖ్య గానీ, ధృవపత్రాల పరిశీలనకు సంబంధించిన వివరాలు కానీ, ఇంటర్వ్యూలకు సంబంధించి 1:7 జాబితా వివరాలు కానీ.. ఇంటర్వ్యూ తరువాత ఉద్యోగాలకు ఎంపికైన అభ్యర్థుల జాబితా గానీ ప్రకటించకుండా గుట్టుచప్పుడు కాకుండా అభ్యర్థులకు నియామక పత్రాలందజేయడం ఏమిటని పలువురు ప్రశ్నిస్తున్నారు. ప్రజాప్రతినిధులు, రాజకీయనాయకుల సిఫార్సు లేఖలు, ఆ శాఖ అధికారులు, కమిటీ సభ్యుల్లో కొందరి చేతివాటం (రూ.లక్షల్లో తీసుకున్నట్టు వినికిడి) ఇందుకు కారణాలై ఉంటాయని భావిస్తున్నారు. ఇంత జరుగు తున్నా జిల్లా కలెక్టరు కానీ, ఆ శాఖ ఉన్నతాధికారులు కానీ దృష్టి సారించకపోవడం గమనార్హం.


Popular posts
*వింజమూరు ప్రజలు జాగ్రత్తలు వహించండి* డాక్టర్ రమేష్.... వింజమూరు, సెప్టెంబర్ 22 (అంతిమ తీర్పు- దయాకర్ రెడ్డి): వింజమూరు మండలంలోని ప్రజలు కరోనా వైరస్ మహమ్మారి పట్ల తగు జాగ్రత్తలు వహించాలని కమ్యూనిటీ హెల్త్ సెంటర్ వైధ్యాధికారి డాక్టర్ రమేష్ కోరారు. ఇప్పటివరకు మండలంలో 500లకు పైగా కరోనా పాజిటివ్ కేసులు నమోదు కావడం జరిగిందన్నారు. అయితే అదే స్థాయిలో బాధితులు కోలుకుంటుండటం సంతోషకరమైన విషయమన్నారు. కరోనా వైరస్ ప్రపంచ వ్యాప్తంగా విస్తరించిన విషయం అందరికీ తెలిసిందేనన్నారు. ఈ వైరస్ పట్ల అవగాహనా రాహిత్యం, నిర్లక్ష్యంగా వ్యవహరించడం శ్రేయస్కరం కాదన్నారు. కరోనా నుండి ప్రజలను కాపాడేందుకు ప్రభుత్వం, వైద్య ఆరోగ్యశాఖలు ఎంతగానో కృషి చేస్తున్నాయన్నారు. అయితే ప్రభుత్వ సూచనలను పెడచెవిన పెట్టడం వలన వైరస్ ప్రబలేందుకు పరోక్షంగా దోహదపడుతున్నామన్నారు. కనీస జాగ్రత్తలు పాటించిన పక్షంలో కరోనాను అంతమొందించడం పెద్ద కష్టమేమీ కాదన్నారు. ప్రతి నిత్యం వేడి వేడి ఆహార పదార్ధాలను భుజించడం, దాహం వేసినప్పుడు గోరువెచ్చని నీటిని సేవించడం, యోగా, ముఖానికి మాస్కులు ధరించడం, భౌతికదూరం పాటించడం వంటి సూచనలను ప్రతి ఒక్కరూ విధిగా అలవాటు చేసుకోవాలన్నారు. వైరస్ సోకిన వారు ఆందోళన చెందాల్సిన అవసరం లేదని రమేష్ తెలిపారు. జలుబు, దగ్గు, జ్వరం వంటి లక్షణాలు కనిపిస్తే వెంటనే వైద్యులను సంప్రదించాలని కోరారు.
Image
ఆ నేరస్తుడిని కఠినంగా శిక్షించాలి : సీఎం జగన్‌
16 న చిన్న, మధ్యతరహా పత్రికల రాష్ట్ర మహాసభ : మల్లెల      
చెన్నకేశవ స్వామి ఆలయ ఈవో నారాయణ రెడ్డి మృతి పట్ల మంత్రి సంతాపం
కరోనా నియంత్రణకు దక్కన్ టూబాకో కంపెనీ  గ్రూప్
Image