10 నుంచి ‘కంటి వెలుగు’

10 నుంచి 'కంటి వెలుగు'
ఉచితంగా పరీక్షలు, కళ్లజోళ్ల పంపిణీ
తొలి దశలో విద్యార్థులకు మాస్‌ స్ర్కీనింగ్‌
ఫ ఎంబీబీఎస్‌ విద్యార్థుల సేవలు వినియోగం
గుంటూరు : కంటి వెలుగు అనే బృహత్తర పథకానికి రాష్ట్ర ప్రభుత్వం శ్రీకారం చుడుతోంది. ప్రపంచ దృష్టి దినోత్సవమైన అక్టోబరు 10న జిల్లాలో ఈ పథకాన్ని ప్రారంభించనున్నారు. ప్రాఽథమిక స్ర్కీనింగ్‌ పరీక్షల్లో దృష్టి దోషాలు (రిఫ్రాక్టివ్‌ ఎర్రర్స్‌) ఉన్న వారిని గుర్తించి తదుపరి వైద్య చికిత్సల కోసం కమ్యూనిటీ ఆరోగ్య కేంద్రాలు, ప్రాంతీయ ఆసుపత్రులు, గుంటూరు ప్రభుత్వ వైద్య బోధన ఆసుపత్రికి పంపుతారు. ఈ పఽథకం నిర్వహణలో జిల్లాలో శంకర కంటి ఆసుపత్రి, ఎల్‌వీ ప్రసాద్‌ ఐ ఇనిస్యిట్యూట్‌కు చెందిన విజన్‌ టెక్నీషియన్‌ సేవలను వినియోగించుకుంటారు.
పథకం అమలు ఇలా : ప్రభుత్వ ప్రైవేటు పాఠశాలల్లో ఒకటి నుంచి పదో తరగతి వరకు చదివే విద్యార్థులకు పాఠశాలల్లోనే కంటి పరీక్షలు జరుపుతారు. ఆయా పరీక్షల్లో ప్రాథమిక దృష్టి దోషాలను గుర్తించి వారి పేర్లను కంటి వెలుగు యాప్‌లో అప్‌లోడ్‌ చేస్తారు. మొత్తం ఐదు రోజుల్లో ఈ ప్రక్రియను పూర్తి చేస్తారు. ప్రాథమిక స్ర్కీనింగ్‌ శిబిరాల్లో గుర్తించిన పిల్లలకు నవంబరు, డిసెంబరు నెలల్లో ఆప్తాల్మిక్‌ అసిస్టెంట్లు దృష్టి దోషాలు నిర్ధారిస్తారు. వైద్య పరీక్షలు పూర్తి చేసిన అనంతరం పీహెచ్‌సీ వైద్యాధికారులు పాఠశాలకు వచ్చి పిల్లలకు ఉచితంగా కళ్లజోళ్లు పంపిణీ చేస్తారు.
సాధారణ ప్రజలకు ఇలా : రెండో దశలో జిల్లాలో సాధారణ ప్రజలకూ కంటి పరీక్షలు చేస్తారు. ఇటీవల కొత్తగా ప్రభుత్వం నియమించిన గ్రామ వలంటీర్ల సేవలను ఇందులో వినియోగించుకుంటారు. వలంటీర్లు తమకు నిర్ధేశించిన గృహాలకు వెళ్లి స్నెలెన్స్‌ చార్ట్‌లతో కంటి పరీక్షలు జరుపుతారు. దృష్టి లోపాలు ఉన్న వారి పేర్లను నమోదు చేసుకుని కంటి వెలుగు యాప్‌లో అప్‌లోడ్‌ చేస్తారు. ఈ సమాచారం ఆధారంగా ఆఫ్తాల్మిక్‌ అసిస్టెంట్లు బాధితులకు తదుపరి కంటి పరీక్షలు జరిపి దృష్టి దోపాలను నిర్ధారిస్తారు. కళ్లజోళ్లు అందజేస్తారు. శుక్లాలు ఇతర శస్త్రచికిత్సలు అవసరమైన వారిని ప్రభుత్వాస్పత్రులకు సిఫార్సు చేస్తారు. పట్టణ ప్రాంతాల్లో గ్రామ వలంటీర్లతో పాటు గుంటూరు వైద్య కళాశాలకు చెందిన 200 మంది ఎంబీబీఎస్‌ విద్యార్థులు, పలు నర్సింగ్‌ పాఠశాలల విద్యార్థుల సేవలను కూడా వినియోగించుకుంటారు.
పీహెచ్‌సీ వైద్యులకు శిక్షణ : జిల్లా అంధత్వ నివారణ సంస్థ ఆధ్వర్యంలో జిల్లా వైద్య ఆరోగ్య శాఖ కార్యాలయంలో  పీహెచ్‌సీ వైద్య సిబ్బందికి శిక్షణ కార్యక్రమాలు ప్రారంభిస్తున్నారు. గుంటూరు, గురజాల డివిజన్‌ పరిధిలోని పీహెచ్‌సీ సిబ్బందికి, నరసరావుపేట, తెనాలి డివిజన్‌ వైద్యులకు,  అర్బన్‌ ప్రాంతంలో పని చేసే వైద్యాధికారులకు శిక్షణ కార్యక్రమాలు జరుగుతాయి. ఇక్కడ శిక్షణ పొందిన పీహెచ్‌సీ డాక్టర్లు, ఆశాలు, ఏఎన్‌ఎంలకు శిక్షణ ఇస్తారు. ఆయా పాఠశాలల ఉపాధ్యాయులకు శిక్షణ ఇస్తారు.
అక్టోబరు 10న ప్రారంభం :  డీఎంహెచ్‌వో డాక్టర్‌ యాస్మిన్‌
జిల్లాలో అక్టోబరు 10 నుంచి పాఠశాలల్లో కంటి వెలుగు పథకం ప్రారంభిస్తున్నాం. సుమారు 6 లక్షల మంది విద్యార్థులకు కంటి పరీక్షలు నిర్వహిస్తాం. దృష్టిలోపాలు ఉన్న వారిని గుర్తించి వారికి కళ్లజోళ్లు అందజేస్తాం. ఈ ఏడాది డిసెంబరు నాటికి విద్యార్థులకు కంటి పరీక్షలు, కళ్లజోళ్ల పంపిణీ పూర్తి చేయాలని లక్ష్యంగా నిర్ణయించాం. రెండో దశ నుంచి సాధారణ ప్రజలకు కంటి పరీక్షలు చేపడతాం.


Popular posts
*వింజమూరు ప్రజలు జాగ్రత్తలు వహించండి* డాక్టర్ రమేష్.... వింజమూరు, సెప్టెంబర్ 22 (అంతిమ తీర్పు- దయాకర్ రెడ్డి): వింజమూరు మండలంలోని ప్రజలు కరోనా వైరస్ మహమ్మారి పట్ల తగు జాగ్రత్తలు వహించాలని కమ్యూనిటీ హెల్త్ సెంటర్ వైధ్యాధికారి డాక్టర్ రమేష్ కోరారు. ఇప్పటివరకు మండలంలో 500లకు పైగా కరోనా పాజిటివ్ కేసులు నమోదు కావడం జరిగిందన్నారు. అయితే అదే స్థాయిలో బాధితులు కోలుకుంటుండటం సంతోషకరమైన విషయమన్నారు. కరోనా వైరస్ ప్రపంచ వ్యాప్తంగా విస్తరించిన విషయం అందరికీ తెలిసిందేనన్నారు. ఈ వైరస్ పట్ల అవగాహనా రాహిత్యం, నిర్లక్ష్యంగా వ్యవహరించడం శ్రేయస్కరం కాదన్నారు. కరోనా నుండి ప్రజలను కాపాడేందుకు ప్రభుత్వం, వైద్య ఆరోగ్యశాఖలు ఎంతగానో కృషి చేస్తున్నాయన్నారు. అయితే ప్రభుత్వ సూచనలను పెడచెవిన పెట్టడం వలన వైరస్ ప్రబలేందుకు పరోక్షంగా దోహదపడుతున్నామన్నారు. కనీస జాగ్రత్తలు పాటించిన పక్షంలో కరోనాను అంతమొందించడం పెద్ద కష్టమేమీ కాదన్నారు. ప్రతి నిత్యం వేడి వేడి ఆహార పదార్ధాలను భుజించడం, దాహం వేసినప్పుడు గోరువెచ్చని నీటిని సేవించడం, యోగా, ముఖానికి మాస్కులు ధరించడం, భౌతికదూరం పాటించడం వంటి సూచనలను ప్రతి ఒక్కరూ విధిగా అలవాటు చేసుకోవాలన్నారు. వైరస్ సోకిన వారు ఆందోళన చెందాల్సిన అవసరం లేదని రమేష్ తెలిపారు. జలుబు, దగ్గు, జ్వరం వంటి లక్షణాలు కనిపిస్తే వెంటనే వైద్యులను సంప్రదించాలని కోరారు.
Image
ఆ నేరస్తుడిని కఠినంగా శిక్షించాలి : సీఎం జగన్‌
16 న చిన్న, మధ్యతరహా పత్రికల రాష్ట్ర మహాసభ : మల్లెల      
చెన్నకేశవ స్వామి ఆలయ ఈవో నారాయణ రెడ్డి మృతి పట్ల మంత్రి సంతాపం
కరోనా నియంత్రణకు దక్కన్ టూబాకో కంపెనీ  గ్రూప్
Image