రాష్ట్రంలో కరోనా కేసుల్లేవు


                                                                                  తేది : 06.03.2020
                                                                                                 అమరావతి


కరోనా వైరస్ పై వస్తున్న వదంతులు నమ్మవద్దు


• రాష్ట్రంలో కరోనా కేసుల్లేవు 


• కరోనాను ఎదుర్కొనేందుకు రాష్ట్ర ప్రభుత్వం సిద్ధంగా ఉంది


• అధిక ధరకు మాస్క్ లు అమ్మితే కఠిన చర్యలు


• ప్రతిరోజు కరోనా వైరస్ పరిస్థితిపై మీడియా బులెటిన్ విడుదల: రాష్ట్ర ఉప ముఖ్యమంత్రి, వైద్య ఆరోగ్యశాఖ మంత్రి ఆళ్ల కాళీ కృష్ణ శ్రీనివాస్(నాని)


• ఫిబ్రవరి 10 తర్వాత విదేశాల నుండి రాష్ట్రానికి వచ్చిన వ్యక్తులు తప్పనిసరిగా తమ వివరాలను వైద్యారోగ్యశాఖకు  అందించాలి


• కరోనా వైరస్ కు సంబంధించి 104 హెల్ప్ లైన్ ఏర్పాటు :ముఖ్యమంత్రి అదనపు ప్రధాన కార్యదర్శి డా.పి.వి రమేష్


• త్వరలో ప్రభుత్వాసుపత్రుల్లో టెస్టింగ్ ల్యాబ్స్ ఏర్పాటు


• రాష్ట్రంలో 20 వేల మెడికల్ షాపుల్లో అందుబాటులో ఫ్రీ మాస్క్ లు: వైద్య ఆరోగ్యశాఖ ప్రత్యేక ప్రధాన కార్యదర్శి డా.కెఎస్.జవహర్ రెడ్డి 


అమరావతి, 6 మార్చి : కరోనా వైరస్ కు సంబంధించి మీడియా, సోషల్ మీడియాలో వస్తున్న వదంతులను ప్రజలు నమ్మవద్దని  రాష్ట్ర ఉప ముఖ్యమంత్రి, వైద్య ఆరోగ్యశాఖ మంత్రి ఆళ్ల కాళీ కృష్ణ శ్రీనివాస్(నాని) అన్నారు. వెలగపూడి సచివాలయంలోని నాల్గవ బ్లాక్ లో ఉన్న ప్రచార విభాగంలో ముఖ్యమంత్రి ప్రత్యేక ప్రధాన కార్యదర్శి డా.పి.వి రమేష్, వైద్యఆరోగ్యశాఖ ప్రత్యేక ప్రధాన కార్యదర్శి జవహర్ రెడ్డి లతో కలిసి ఉపముఖ్యమంత్రి మీడియాతో మాట్లాడారు.రాష్ట్రంలో ఇప్పటివరకు ఒక్క కరోనా కేసు నమోదుకాలేదని స్పష్టం చేశారు.ఇప్పటివరకు మొదటిదశలో 11, రెండవ దశలో 13 కేసులు మొత్తం 24 కేసులు వైద్యారోగ్యశాఖ దృష్టికి రాగా వారి శాంపిల్స్ ను పూణేలోని ల్యాబ్ కు పంపించామన్నారు. అందులో 20 మందికి వ్యాధిలేదని తేలినట్లు నిర్ధారించారన్నారు. మరో నలుగురి సమాచారం రావాల్సి ఉందని వెల్లడించారు. నలుగురిలో ముగ్గురు శ్రీకాకుళం వాసులుకాగా, ఒకరు ఒంగోలుకు చెందిన వ్యక్తిగా గుర్తించామన్నారు. ఇప్పటివరకు వచ్చిన కేసులన్నీ అనుమానిత కేసులేనని మంత్రి స్పష్టం చేశారు.తిరుపతిలో ఒక అనుమానిత కేసు వచ్చినప్పటికీ వారికి కరోనా సోకలేదని తేలడంతో ఇంటికి పంపినట్లు వెల్లడించారు. కరోనా వైరస్ సోకకుండా ఉండేందుకు ముందస్తు జాగ్రత్తలు తీసుకుంటే సరిపోతుందని మంత్రి సూచించారు. ఈ అంశానికి సంబంధించి ముఖ్యమంత్రి వైఎస్ జగన్మోహన్ రెడ్డి ఈరోజు ఉదయం మూడు గంటలకు పైగా వైద్య ఆరోగ్యశాఖతో పాటు ఇతర శాఖలతో సమీక్షా సమావేశం నిర్వహించి దిశానిర్ధేశం చేశారన్నారు.  కరోనా వైరస్ కు సంబంధించి రాష్ట్ర వైద్య ఆరోగ్య శాఖ అప్రమత్తంగా ఉందని తెలిపారు. మాస్క్ లను బ్లాక్  మార్కెట్ లో విక్రయిస్తే కఠిన చర్యలు తీసుకుంటామన్నారు.దీనికి సంబంధించి ఇప్పటికే ఒంగోలులో రెండు షాపులపై కేసులు నమోదు చేశామన్నారు. అధిక ధరలకు ఎవరైనా మార్కెట్లో మాస్క్ లు విక్రయిస్తే కఠిన చర్యలుంటాయని హెచ్చరించారు. మందుల కొరత ఉందని వస్తున్న వార్తలు అవాస్తవమని, సరిపడా మందులతో పాటు మాస్క్‌ లు తదితర ఎక్విప్ మెంట్, సిబ్బంది ఉన్నారని మంత్రి స్పష్టం చేశారు.  రాష్ట్రంలోకి కరోనా వైరస్ ప్రవేశిస్తే  ఎదుర్కొనేందుకు ప్రభుత్వం సిద్ధంగా ఉందని మంత్రి ధీమా వ్యక్తం చేశారు. కరోనాపై ఈరోజు  కేంద్రం నిర్వహించే కార్యశాల(వర్క్ షాప్)లో రాష్ట్ర ప్రభుత్వం తరపున ఐదుగురు సభ్యులతో కూడిన బృందాన్ని ఢిల్లీకి పంపినట్లు మంత్రి వెల్లడించారు. మార్చి 9న రాష్ట్రస్థాయిలో శిక్షణాకార్యక్రమం ఏర్పాటు చేసి రాష్ట్ర, జిల్లా, మండల, గ్రామ స్థాయిల్లో వైద్యులకు శిక్షణను ఇస్తామన్నారు. కరోనా వైరస్ ను ఎదుర్కోవడం ఎలా, ముందస్తు జాగ్రత్తలు, నివారణ చర్యలు తదితర అంశాలను క్యాంపులో వివరిస్తామన్నారు. ప్రజలెవరూ భయభ్రాంతులకు గురికావాల్సిన అవసరం లేదని, దుష్ప్రచారాలను నమ్మవద్దని హితవు పలికారు.


ముఖ్యమంత్రి అదనపు ప్రధాన కార్యదర్శి డా.పి.వి రమేష్ మాట్లాడుతూ కరోనా వైరస్ అనేది కరోనా సోకిన వ్యక్తి నుంచి ఇతరులకు సోకుతుందన్నారు. మరే ఇతర మార్గాల ద్వారా ఈ వైరస్ వ్యాప్తి చెందదన్నారు. జంతువుల ద్వారా, చికెన్, మటన్ తినడం ద్వారా కరోనా వ్యాప్తి చెందనని, అది సోకిన వ్యక్తికి దగ్గరగా ఉంటే తప్ప వ్యాప్తి చెందే అవకాశం లేదన్నారు. ఒకవేళ వైరస్ సోకినా 14 నుండి 28 రోజుల వరకు లక్షణాలు కన్పించవన్నారు. ఎక్కువగా గొంతు, ముక్కు ద్వారా వైరస్ శరీరంలోకి ప్రవేశిస్తుందని వివరించారు. కరోనా సోకిన వారిని  తాకితే అధికశాతం మంది నామమాత్రపు చికిత్స తీసుకుంటే సరిపోతుందని, ఐదు శాతం మంది మాత్రమే ఐసీయూ దాకా వెళ్లాల్సి ఉంటుందన్నారు. ముఖ్యమంత్రి ప్రతీ రోజూ ఈ విషయమై సమీక్షలు జరుపుతూ పలు సలహాలు, సూచనలు ఇస్తున్నారన్నారు. వైద్యఆరోగ్యశాఖ మంత్రి కరోనాపై అప్రమత్తంగా ఉన్నారని తెలిపారు. ఇదో కొత్త రకం వైరస్ అని వెల్లడించారు. ఫిబ్రవరి 10 తర్వాత విదేశాల నుండి రాష్ట్రానికి వచ్చిన వ్యక్తులు తప్పనిసరిగా తమ వివరాలను వైద్యారోగ్యశాఖకు  అందించాలని కోరారు. అదే విధంగా అనుమానితులు 104 హెల్ప్ లైన్ కు ఫోన్ చేసి తగిన సమాచారం పొందవచ్చన్నారు. విదేశాల నుంచి వచ్చిన వారు ఎవరైనా ఇంటివద్దే ఉండాలని, జనసంచార ప్రాంతాల్లో తిరగవద్దని సూచించారు. అవసరమైతే తప్ప ఎవరూ దూర ప్రయాణాలు చేయవద్దని హితవు పలికారు. చేతులు కడుక్కోవడం, ముఖానికి మాస్క్ లు ధరించడం, ఎస్క్ లేటర్, తలుపులు, బల్లలపై చేతులు వేయకుండా ఉండటం వంటి సాధారణ జాగ్రత్తలు తీసుకుంటే కరోనాను నియంత్రిచవచ్చన్నారు. ప్రజలను ఆందోళనకు గురిచేయకుండా మీడియా, సోషల్ మీడియా వాస్తవాలను ప్రసారం చేయాలని కోరారు. తప్పుడు కథనాలు ప్రచారం చేయవద్దని హితవు పలికారు. కరోనా కూడా అన్ని జబ్బుల్లాంటిదేనని ఎవరూ భయపడాల్సిన అవసరం లేదని పిలుపునిచ్చారు. ఏ సమస్య ఉన్నా వెంటనే ప్రభుత్వం దృష్టికి తీసుకురావాలన్నారు. విదేశాల నుంచి వచ్చిన వారు బాధ్యతగా తమ వివరాలు వైద్య ఆరోగ్యశాఖకు తెలియపరచాలన్నారు. ప్రస్తుతం కరోనా వ్యాప్తి నేపథ్యంలో రాష్ట్రప్రభుత్వం జారీ చేసిన ఆరోగ్య సలహాలు, వరల్డ్ హెల్త్ ఆర్గనైజేషన్ సూచనలు  ప్రజలు పాటించాల్సిందిగా కోరారు. 


వైద్య ఆరోగ్యశాఖ ప్రత్యేక ప్రధాన కార్యదర్శి డా.కెఎస్.జవహర్ రెడ్డి మాట్లాడుతూ కరోనా వైరస్ దరి చేరకుండా ప్రజలు ముందస్తు తీసుకోవాల్సిన జాగ్రత్తలను  తీసుకోవాలన్నారు. దేశంలో కరోనా వైరస్ లు నమోదైన దృష్ట్యా రాష్ట్రంలో ఇప్పటివరకు 351 మందిని పరిశీలనలో పెట్టామన్నారు. ఇప్పటికే కరోనా వైరస్ పై వివిధ శాఖల ఉన్నతాధికారులు, జిల్లా కలెక్టర్లు, ఎస్పీల ను సమన్వయపరుస్తూ సీఎస్ అధ్యక్షతన రెండు సార్లు సమీక్ష నిర్వహించామన్నారు. కరోనా వ్యాప్తి చెందకుండా ఉండేందుకు తీసుకోవాల్సిన జాగ్రత్తలపై చర్చించామన్నారు. రాష్ట్రస్థాయిలో కంట్రోల్ రూమ్ లు ఏర్పాటు చేసి నెల అవుతుందన్నారు. నిన్ననే 104 హెల్ప్ లైన్ ను ఏర్పాటు చేశామన్నారు. ఎవరికైనా కరోనాకు సంబంధించిన అనుమానాలుంటే హెల్ప్ లైన్ కు ఫోన్ చేసి నివృత్తి చేసుకోవచ్చన్నారు. ప్రతిరోజూ ఉదయం 8 గంటలకు ఒకసారి, రాత్రి 8 గంటలకు ఒకసారి ఆరోగ్యపరిస్థితిపై బులెటిన్ విడుదల చేస్తున్నామన్నారు. కరోనా పాజిటివ్ కేసులు వస్తేనే ఎన్ 95 మాస్క్ లు వాడాలన్నారు. ఇప్పటికే లక్షా పదివేల ఎన్ 95 మాస్క్ లు అందుబాటులో ఉంచామన్నారు. రాష్ట్రంలో 20 వేల మెడికల్ షాపుల్లో ఫ్రీ మాస్క్ లు అందుబాటులో ఉంచామన్నారు. ఎవరైనా మాస్క్ లను బ్లాక్ చేయడం, అధిక ధరలకు అమ్మడం వంటివి చేస్తుంటే వారిపై చట్టపరమైన చర్యలు తీసుకుంటామన్నారు. త్వరలో రాష్ట్రంలో టెస్టింగ్ ల్యాబ్స్ ఏర్పాటు చేసేందుకు ముఖ్యమంత్రి సంసిద్ధత వ్యక్తం చేశారన్నారు. దీనికి సంబంధించి రూ.100 కోట్లు వినియోగించుకునేలా వెసులుబాటు కల్పించారని తెలిపారు. ఇప్పటికే ఐసీఎంఆర్ తో ఈ విషయమై చర్చించామన్నారు. త్వరలో రాష్ట్రంలోని ప్రభుత్వాసుపత్రుల్లో టెస్టింగ్ ల్యాబ్స్ ఏర్పాటు చేయనున్నామన్నారు.  ఈనెల 4వ తేదీన ఇటలీ దేశం నుండి రాష్ట్రానికి 23 మంది వచ్చారని, వారిలో 14 మందికి ఢిల్లీ ఎయిర్ పోర్టులోనే వైద్య పరీక్షలు నిర్వహించగా నెగెటివ్ రిపోర్ట్ వచ్చిందన్నారు. మరో నలుగురు వ్యక్తులు అందుబాటులో లేరని వారి వివరాలు సేకరిస్తున్నామన్నారు. మిగిలిన వారు స్వగ్రామాలకు వచ్చిన వెంటనే పరీక్షలు నిర్వహిస్తామన్నారు. వీరందరిని హౌస్ ఐసోలేషన్ లో ఉంచుతామన్నారు. చైనా నుంచి విశాఖకు నౌక వచ్చిందని దీనిపై నౌకాదళ అధికారుల నుండి నిబంధనల ప్రకారం వివరాలు సేకరించి వెల్లడిస్తామన్నారు. 


 


..............


Popular posts
జ‌ర్న‌లిస్ట్ కాల‌నీ అభివృద్ధికి స‌హ‌క‌రించండి.. * కమిషనర్‌ను కలిసిన నెల్లూరు హౌసింగ్ సొసైటీ ప్ర‌తినిధులు‌ నెల్లూరు: పాత్రికేయుల‌కు నెల్లూరులో ప్ర‌భుత్వం కేటాయించిన జ‌ర్న‌లిస్ట్ కాల‌నీ అభివృద్ధికి స‌హ‌క‌రించాల‌ని కోరుతూ ది నెల్లూరు జర్నలిస్టుల మ్యూచువల్లి ఎయిడెడ్ కో- అపరేటివ్ హౌస్ బిల్డింగ్ సొసైటీ లిమిటెడ్ నెల్లూరు అ‌డహక్ కమిటీ కన్వీనర్, అధ్యక్షులు వి.శేషాచలపతి, కో- కన్వీనర్, ఉపాధ్యక్షులు వల్లూరు ప్రసాద్‌కుమార్ బుధవారం మున్సిప‌ల్ కమిషనర్ కె.దినేష్‌కుమార్‌ను కలిసి వినతిపత్రం అందజేశారు. ఈ సందర్భంగా కన్వీనర్ శేషాచలపతి మాట్లాడుతూ కొత్తూరులో ఉన్న న్యూ జర్నలిస్ట్ కాలనీకి సంబంధించిన 20 ఎకరాల లే అవుట్‌లో ఉన్న పబ్లిక్, ఓపెన్ స్పెసెస్ స్థలాలు, రోడ్లను కార్పొరేషన్‌లోని టౌన్ ప్లానింగ్ విభాగం త‌ర‌ఫున అభివృద్ధి చేయాలని కోరారు. జ‌ర్నలిస్టులు కొత్తగా ఇల్లు నిర్మించుకోనున్న వారికి టౌన్ ప్లానింగ్ ద్వారా హౌస్ ప్లాను అనుమతులను వెంటనే ఇవ్వాలన్నారు. అలాగే ప్రభుత్వ ఉత్తర్వులు ప్రకారం నిర్ణిత రుసుముతో ప్లాను మంజూరు చేయాలని పేర్కొన్నారు. కార్యక్రమంలో డైరెక్టర్ గట్టుపల్లి శివకుమార్ తదితరులు పాల్గొన్నారు.
Image
*కరోనాను జయించిన వింజమూరు ఎస్.ఐ బాజిరెడ్డి* వింజమూరు, అక్టోబర్ 14 (అంతిమ తీర్పు- దయాకర్ రెడ్డి): వింజమూరు ఎస్.ఐ ఏ.బాజిరెడ్డి కరోనాను జయించి బుధవారం నాడు స్థానిక పోలీస్ స్టేషన్ లో విధులకు హాజరయ్యారు. ఈ సందర్భంగా కలిగిరి సి.ఐ శ్రీనివాసరావు ఎస్.ఐ బాజిరెడ్డికి ఘన స్వాగతం పలికారు. పూలమాలలు వేసి అభినందించారు. ఈ సందర్భంగా సి.ఐ శ్రీనివాసరావు మాట్లాడుతూ కరోనా కాలంలో పోలీసులు ప్రజలను కాపాడేందుకు చేసిన కృషి అందరికీ తెలిసిందేనన్నారు. పగలనక రేయనక ప్రజలను అప్రమత్తం చేసిన విషయం జగమెరిగిన సత్యమన్నారు. ఈ కరోనా యుద్ధంలో పలువురు పోలీసులు సైతం కరోనా బారిన పడటం జరిగిందన్నారు. అయితే మనోధైర్యం, గుండె నిబ్బరంతో కరోనాతో పోరాడి విజేతలుగా నిలవడం గర్వించదగిన విషయమన్నారు. ఎస్.ఐ బాజిరెడ్డి మాట్లాడుతూ వింజమూరు మండల ప్రజల ఆదరాభిమానాలు తనకు శ్రీరామరక్షగా నిలిచాయన్నారు. కరోనా మహమ్మారిని ఎవరూ కూడా తక్కువ అంచనా వేయరాదన్నాను. అప్రమత్తంగా ఉంటూ తగు జాగ్రత్తలు తీసుకోవాలని మండల ప్రజలకు విజ్ఞప్తి చేశారు. ఈ సన్మాన కార్యక్రమంలో ఏ.ఎస్.ఐ సాయిప్రసాద్, హెడ్ కానిస్టేబుళ్ళు బాబూరావు, జిలానీభాషా, పోలీసు సిబ్బంది పాల్గొన్నారు.
Image
వింజమూరు బంగ్లాసెంటెర్ లో గుట్కాలు పట్టివేత* ఒకరి అరెస్ట్... వింజమూరు, అక్టోబర్, 18 (అంతిమ తీర్పు-దయాకర్ రెడ్డి): నెల్లూరు జిల్లా, వింజమూరు మండల కేంద్రం లోని బంగ్లా సెంటర్ వద్ద ఆదిలక్ష్మి ప్రావిశన్ షాప్ లో ఆదివారం ఉదయం కలిగిరి సీఐ శ్రీనివాసరావు, వింజమూరు యస్ ఐ బాజిరెడ్డి లు ఆకస్మిక తనికీలు నిర్వహించారు, ఇందులో భాగంగా 9762 నిషేదిత గుట్కా ప్యాకెట్లను స్వాధీనం చేసుకొని షాప్ యజమాని మూలి హజరత్ రెడ్డి ని అరెస్ట్ చేసారు. ఈ సందర్బంగా వింజమూరు ఐ బాజిరెడ్డి మాట్లాడుతూ... నిషేదిత గుట్కా ఉత్పత్తుల అమ్మకాలపై తమ శాఖకు ముందస్తుగా అందిన సమాచారం మేరకు జిల్లా sp భాస్కర్ భూషణ్ కావలి DSP ప్రసాద్ ఆదేశాలమేరకు తమ సర్కిక్ ఇన్సోఏక్టర్ శ్రీనివాసరావు సూచనలమేరకు సంయుక్తంగా దాడులు నిర్వహించడం జరిగిందని అన్నారు. సత్వరమే సదరు నిందితుడిపై కేసు నమోదు చేయటంతోపాటు కోర్టు కు హాజరు పరచనున్నామన్నారు. అంతేగాక వింజమూరు మండలం లో ఎక్కడైనా సరే అక్రమ మద్యం విక్రయాలు, నిషేదిత గుట్కాల అమ్మకాలు, కిడిపంద్యాలు, పేకాట, తదితర చట్ట వ్యతిరేఖ కార్యకలాపాలపై ప్రజలు ఎప్పటికప్పుడు తమకు సమాచారం అందించాలని యస్ ఐ బాజిరెడ్డి మండల ప్రజలకు సూచించారు.
Image
*ఉపాధి పనుల్లో కొండంత అవినీతిని గోరంతగా ప్రజావేదికలో తేల్చిన అధికారులు* ఉదయగిరి, అక్టోబర్ 20 (అంతిమ తీర్పు - ఇంచార్జ్ దయాకర్ రెడ్డి): గ్రామీణ ప్రాంతాల్లో వలసల నివారణకు కేంద్ర ప్రభుత్వం ప్రతిష్టాత్మకంగా ప్రవేశపెట్టిన గ్రామీణ ఉపాధి హామీ పథకం అధికారులకు కాసుల వర్షం కురిపించే కల్పతరువుగా రంగా మారింది. నెల్లూరు జిల్లా ఉదయగిరి నియోజకవర్గం వరికుంటపాడు మండలం లో 2017,2018,2019 సంవత్సరం నుంచి ఇప్పటివరకు జరిగిన 24.88 కోట్ల రూపాయలు పనులలో 7.69 లక్షలు రూపాయలు అవినీతి జరిగినట్లు సామాజిక తనిఖీ లో అధికారులు నిగ్గు తేల్చారు. దాదాపు 5 కోట్ల రూపాయలు అవినీతి జరిగిందని ప్రజలు గుసగుసలు వినిపిస్తున్నాయి.అంతే కాకుండా గ్రామాలలో లేని వారి పేర్లు ఫీల్డ్ అసిస్టెంట్ లు మస్టర్లలో వేసుకొని పెద్ద ఎత్తున ఉపాధి అధికారులు మండల స్థాయి అధికారులు అవినీతికి పాల్పడినట్లు తెలుస్తున్న అధికార పార్టీ నాయకులను లోబర్చుకుని పెద్ద ఎత్తున అవినీతికి పాల్పడిన సామాజిక తనిఖీ ఆడిట్లో అవినీతి బయట పడకుండా పెద్ద ఎత్తున నగదు చేతులు మారినట్లు ప్రజలు అనుకుంటున్నారు. ప్రభుత్వ ధనాన్ని దుర్వినియోగం చేసిన సంబంధిత మండల ఉపాధి అధికారులు మండల స్థాయిఅధికారులపై చర్యలు తీసుకోవాల్సిన అవసరం ఎంతైనా ఉందని వరికుంటపాడు ప్రాంత ప్రజలు కోరుతున్నారు.
Image
*పేకాట స్థావరంపై కలిగిరి సి.ఐ మెరుపు దాడులు* వింజమూరు, అక్టోబర్ 5 (అంతిమ తీర్పు-దయాకర్ రెడ్డి): నెల్లూరుజిల్లా వింజమూరు మండలంలోని నందిగుంట గ్రామ సమీపంలో పేకాట స్థావరంపై సోమవారం సాయంత్రం కలిగిరి సర్కిల్ ఇన్స్ పెక్టర్ శ్రీనివాసరావు స్వయంగా మెరుపు దాడులు నిర్వహించారు. ఈ దాడులలో 35,600 రూపాయల నగదు, 12 ద్విచక్ర వాహనాలు, 11 సెల్ ఫోన్లు స్వాధీనం చేసుకోవడంతో పాటు 10 మంది పేకాట రాయుళ్ళను అదుపులోకి తీసుకున్నారు. ఈ సందర్భంగా సి.ఐ శ్రీనివాసరావు మాట్లాడుతూ కలిగిరి సర్కిల్ పరిధిలోని కలిగిరి, కొండాపురం, వింజమూరు మండలాలలో అసాంఘిక కార్యకలాపాలను ఎట్టి పరిస్థితులలోనూ ఉపేక్షించబోమన్నారు. పేకాట, కోడి పందేలు, అక్రమంగా మద్యం విక్రయాలు, నిషేదిత గుట్కా విక్రయాలపై ఉక్కుపాదం మోపనున్నామని హెచ్చరించారు. ఈ మండలాలలో ఎక్కడైనా సరే ఛట్ట వ్యతిరేక కార్యక్రమాలకు పాల్బడినా, శాంతి భధ్రతలకు విఘాతం కలిగించినా కఠిన చర్యలు తీసుకుంటామన్నారు. శాంతి భధ్రతల పరిరక్షణలో భాగంగా ప్రజలు పోలీసులకు సహకరించాలని కోరారు. అసాంఘిక శక్తుల సమాచారమును ప్రజలు తమకు తెలియపరిచి శాంతి భధ్రతల పరిరక్షణకు దోహదపడాలని సి.ఐ ప్రజలకు పిలుపునిచ్చారు. సమాచారం అందించిన వారి వివరాలను అత్యంత గోప్యంగా ఉంచుతామని తెలియజేశారు. పేకాట శిబిరంపై ఆకస్మికంగా నిర్వహించిన మెరుపు దాడులలో కలిగిరి ఎస్.ఐ వీరేంద్రబాబు, వింజమూరు ఎ.ఎస్.ఐ సాయి ప్రసాద్, వింజమూరు, కలిగిరి పోలీస్ స్టేషన్లకు చెందిన సిబ్బంది పాల్గొన్నారు.
Image