<no నగర పాలక సంస్థ ఎన్నికలకు సర్వం సిద్ధం

నగర పాలక సంస్థ ఎన్నికలకు సర్వం సిద్ధం
●నేటి నుంచి నామినేషన్ల ప్రక్రియ
●కట్టుదిట్టమైన పోలీసు భద్రత
●అందుబాటులో హెల్ప్‌ డెస్క్‌
జిల్లా కేంద్రం ఏలూరు నగర పాలక సంస్థ ఎన్నికలకు అధికార యంత్రాంగం సర్వం సిద్ధం చేసింది. నామినేషన్ల ప్రక్రియ ప్రారంభం నుంచి పోలింగ్‌, కౌంటింగ్‌ వరకు తీసుకోవాల్సిన చర్యలు, జాగ్రత్తలు, ఏర్పాట్లను పూర్తి చేశారు. కలెక్టర్‌ ముత్యాలరాజు ఆదేశాల మేరకు నగర కమిషనర్‌ చంద్రశేఖర్‌ దీనికి సంబంధించి ప్రణాళికాబద్ధంగా ముందుకు వెళుతున్నారు.
ఏలూరు : ఏలూరు నగరంలో 2,47,631 మంది ఓటర్లు ఉండగా వారంతా స్వేచ్ఛగా తమ ఓటు హక్కును వినియోగించుకునేలా చర్యలు చేపట్టారు. ఈనెల 11 నుంచి 13 వరకు నామినేషన్ల ప్రక్రియ జరగనున్న నేపథ్యంలో దానికి అవసరమైన సౌకర్యాలను సిద్ధం చేశారు. అభ్యర్థుల సందేహాలను నివృత్తి చేసేందుకు కార్పొరేషన్‌ కార్యాలయంలో ప్రత్యేకంగా హెల్ప్‌ డెస్క్‌ ఏర్పాటు చేశారు. అధికారులకు తగు సూచనలు, సలహాలను అందిస్తూ ఎన్నికల నిర్వహణకు సన్నద్ధం చేస్తున్నారు. ఎన్నికల నిర్వహణకు 13 మంది రిటర్నింగ్‌ అధికారులను మరో 13 మంది అసిస్టెంట్‌ రిటర్నింగ్‌ అధికారులను నియమించారు. అత్యవసర పరిస్థితుల్లో  అవసరానికి ఉపయోగపడేలా మరో ఆరుగురు అధికారులను రిజర్వ్‌లో ఉంచారు.
మూడు రోజులూ హడావుడే
నామినేషన్‌ ప్రక్రియ ఈనెల 11న ప్రారంభమై మూడు రోజుల పాటు 13వ తేదీ వరకు ఉంటుంది. ఉదయం 11 గంటల నుంచి సాయంత్రం మూడు గంటల వరకు అధికారులు నామినేషన్లు స్వీకరిస్తారు. దీంతో ఈ మూడు రోజులూ కార్పొరేషన్‌ కార్యాలయం వద్ద సందడి వాతావరణం నెలకొంటుంది. నామినేషన్‌ ప్రక్రియ నేపథ్యంలో కార్పొరేషన్‌ కార్యాలయం వద్ద కట్టుదిట్టమైన పోలీసు భద్రతను ఏర్పాటు చేశారు. నామినేషన్లు వేసేందుకు వచ్చే అభ్యర్థులు, వారికి సహాయకులు మాత్రమే కార్పొరేషన్‌ కార్యాలయంలోకి ప్రవేశించాలి. మిగిలిన అనుచర గణాన్ని కార్పొరేషన్‌ కార్యాలయానికి వంద మీటర్ల దూరంలో నిలిపివేస్తారు. ఊరేగింపులు, తీన్‌మార్‌ డ్యాన్సులు వంటివి అనుమతించరు.
పోలింగ్‌ బూత్‌లు సిద్ధం.. 
ఎన్నికల పోలింగ్‌ నిమిత్తం నగరంలో 216 బూత్‌లను ఏర్పాటు చేశారు. మొత్తం ఎన్నికలకు 1,296 మంది సిబ్బందిని వినియోగించనున్నారు. నలుగురు జోనల్‌ అధికారులు, 12 మంది రూట్‌ ఆఫీసర్లను రంగంలోకి దింపారు. దీంతో పాటు అభ్యర్థుల ప్రచారపర్వాన్ని పర్యవేక్షించేందుకు నిబంధనలను మీరితే చర్యలు చేపట్టేందుకు ఫ్లయింగ్‌ స్క్వాడ్‌లను, సంచార బృందాలను ఏర్పాటు చేశారు. ఎన్నికల ప్రక్రియను నిరంతరం పరిశీలిస్తారు. అంతే కాకుండా బూత్‌ల వద్ద అవసరమైన సౌకర్యాలను సిద్ధం చేశారు. విద్యుత్తు, తాగునీటి వసతి, పరిసరాల పరిశుభ్రత, ఇతర ఏర్పాట్లు చేశారు.
84 సమస్యాత్మక ప్రాంతాలు
నగరంలోని 50 డివిజన్లకు సంబంధించి 84 సమస్యాత్మక ప్రాంతాలను గుర్తించారు. దీంతో అక్కడ బూత్‌ల వద్ద కట్టుదిట్టమైన భద్రతను ఏర్పాటు చేయనున్నారు. అదేవిధంగా పోలీసు బూత్‌ల్లో నిఘా కెమెరాలను ఏర్పాటు చేశారు. నగర పాలక సంస్థ కార్యాలయం నుంచి వీటిని పర్యవేక్షిస్తారు. బూత్‌ల వద్ద గందరగోళ వాతావరణం ఏర్పడితే వెబ్‌ కెమెరాల ద్వారా తెలుసుకుని అవసరమైన చర్యలు చేపట్టేలా ప్రణాళిక రూపొందించారు. సమస్యాత్మక ప్రాంతాలను ఇప్పటి నుంచే గమనిస్తూ పోలింగ్‌ నాడు ఎటువంటి అవాంఛనీయ ఘటనలు జరగకుండా కట్టుదిట్టమైన చర్యలు తీసుకుంటున్నారు.
ఎన్నికల నిర్వహణకు ఏర్పాట్లు చేశారు.
ఏలూరు నగర పాలక సంస్థ ఎన్నికలను ప్రశాంత వాతావరణంలో నిర్వహించేందుకు అవసరమైన ఏర్పాట్లన్నీ ఇప్పటికే సిద్ధం చేశాం. సిబ్బందికి ప్రత్యేక కార్యాచరణ నిర్వహించి శిక్షణ అందించాం. నామినేషన్ల ప్రక్రియ ప్రారంభమవుతున్న దృష్ట్యా అంతా అప్రమత్తంగా పనిచేయాలని ఆదేశాలు జారీ చేశాం. నామినేషన్ల దగ్గర నుంచి కౌంటింగ్‌ వరకు ప్రత్యేక శ్రద్ధతో అంతా పనిచేసేలా ఆదేశాలు జారీ చేశాం. నగర పాలక సంస్థలో విలీన గ్రామాలు కలవడంతో అభ్యర్థులు తికమక పడకుండా తమ వార్డుల్లోని ఓట్లను, సరిహద్దులను గమనించి ముందుకెళ్లాలని కోరుతున్నాం. సందేహాలుంటే నివృత్తి చేసేందుకు సిద్ధంగా ఉన్నాం. - చంద్రశేఖర్‌, నగర కమిషనర్‌