దేవినేని ఉమాను అడ్డుకున్న పోలీసులు.. హౌస్‌ అరెస్టు


కృష్ణా జిల్లా : తెలుగుదేశం పార్టీ నేత, మాజీ మంత్రి దేవినేని ఉమామహేశ్వరావు గొల్లపూడిలోని ఎన్టీఆర్‌ విగ్రహం వద్దకు వెళ్తుండగా పోలీసులు ఆయనను అడ్డుకుని హౌస్‌ అరెస్టు చేశారు. ధర్నాలకు అనుమతి లేదంటూ పోలీసులు ఉమాకి నోటీసులు జారీ చేశారు. శాంతియుతంగా ధర్నా చేసేవారిని హౌస్‌ అరెస్టు చేయడం దారుణమని, పోలీసులను అడ్డంపెట్టుకుని సీఎం జగన్‌ ఇలాంటి ఆకృత్యాలకు పాల్పడుతున్నారని ఆయన విమర్శించారు. చాలా మంది టీడీపీ నేతలను హౌస్‌ అరెస్టు చేశారని మండిపడ్డారు. అందరికీ అందుబాటులో ఉండే విధంగా ఇసుక పాలసీని తీసుకురావాలని దేవినేని ఉమా డిమాండ్ చేశారు. రాష్ట్ర వ్యాప్తంగా ఇసుక ఇబ్బందులపై ఆందోళనలు చేయడానికి టీడీపీ శ్రేణులు పిలుపు ఇచ్చిన విషయం తెలిసిందే.